Осминафиналето на последното Европско првенство на коешто бевме коорганизатори ги зголемува апетитте на македонскиот машки национален тим. Успехот никогаш не е конечен, па нашата репрезезентација во следната 2024-та повторно ќе игра во Европската златна лига на ЦЕВ, којашто првпат ќе биде организирана со натпреварувачки формат како елитното одбојкарско натпреварување – Лигата на нации на ФИВБ. За разлика од досега, нема да има една фиксна група, туку сите 12 репрезентации ќе одиграат по шест натпревари со различни противници на вкупно три турнири, а тоа значи дека секоја федерација ќе организира по еден турнир. Потоа ќе биде одредена конечната табела, а четирите најдобри ќе обезбедат учество во полуфиналето. Исто како годинава, Хрватска се пријави да го организира завршниот турнир, на 15-ти и на 16-ти, јуни, така што доколку таа не е во првиот квартет, заедно со неа, за медал ќе се борат трите првопласирани од лигашкиот сегмент
Македонија ќе биде домаќин на првиот турнир во периодот од 17-ти до 19-ти мај. Тогаш ќе ни гостуваат поранешните освојувачи на Европската лига Чешка и Естонија, а на вториот од 24-ти до 26-ти истиот месец ќе одиме во Белгија на дуели со нашиот лански ривал и со Азербејџан. Од 31-ви мај до 2-ри јуни македонските одбојкари ќе бидат во Хрватска на соочување со домаќинот, којшто исто така беше во група со нас годинава, но и со Шпанија.
Во двете Европски лиги 2024 ќе настапат 38 репрезентации од 24 национални федерации. ОФМ овој пат реши Македонија да ја претставува само машкиот состав, а дамите ќе играат во квалификациите за Европското првенство во 2026. Првите три натпревари од тој циклус во двете конкуренции (машка и женска) се закажани за август.
Распоред на Македонија во Европската златна лига 2024 (мажи):
Турнир 1 (Македонија)
17.05.2024 МАКЕДОНИЈА – Естонија
18.05.2024 Чешка – Естонија
19.05.2024 МАКЕДОНИЈА – Чешка
Турнир 2 (Белгија)
24.05.2024 Азербејџан – Белгија
25.05.2024 МАКЕДОНИЈА – Азербејџан
26.05.2024 МАКЕДОНИЈА – Белгија
Турнир 3 (Хрватска)
31.05.2024 МАКЕДОНИЈА – Хрватска
01.06.2024 МАКЕДОНИЈА – Шпанија
02.06.2024 Хрватска – Шпанија
