Два добри сета, водство во вториот и нерешен резултат во завршната фаза од него, со една оценка, многу подобра игра на македонските одбојкарки на гостувањето во Естонија во Европската сребрена лига. Тоа не беше доволно за да се освои првиот сет во четвртиот настап во премиерното учество за нас во натпреварувањето на ЦЕВ, но севкупниот впечаток е позитивен иако противничките победија со 3:0 (25:22, 25:20 и 25:16).
Репрезентацијата предводена од селекторот Стефан Пауновиќ на моменти изгледаше сигурно, одбојкарките не беа во толкав грч како на првите три средби во Скопје, а тоа им овозможи да се вратат во првиот сет за неизвесна завршница, а во вториот да направат серија за водство од 12:11, потоа и да бидат рамноправни и да имаат нерешени 18:18. Сепак, Естонките кои се први во групата со максимални четири победи и со само еден загубен сет, имаа повеќе ресурси за да ги контролираат клучните поени.
По денешниот меч, македонските одбојкарки со поголема самодоверба ќе одат во Летонија каде што в среда ќе го одиграат петтиот меч во дебито во Европската сребрена лига, со надеж дека таму можеби ќе успеат да минат уште една бариера и да го освојат тој толку посакуван премиерн сет.
