Четвртипат по ред Македонија и Хрватска играат пет сета во меѓусебните пресметки. За жал вечерва се радуваше противникот и израмни на 3-3 во шесте натпревари со нас. Како и во Скопје пред десет дена, максимално неизвесно беше и во петтото коло од групата „Бе“ во Еверопската златна лига. Македонските одбојкари може да жалат затоа што не остварија победиво Задар, а со тоа пропуштија можност да се вратат на второто место на табелата во пресрет на неделниот меч со Украина, која веќе обезбеди пласман на завршниот турнир.
Македонија одлично почна во арената „Крешимир Чосиќ“ којашто ќе биде домаќин на елиминацискиот дел од најквалитетното годишно натпреварување на ЦЕВ. Првиот сет го контролиравме целосно и го лесно го завршивме, но во вториот Хрватите рано направија разлика, па не успеавме да се заканиме затоа што не можевме да влеземе во стабилност поради лошиот сервис и повремениот ритам на нашите најдобри напаѓачи. Потоа селекторот Јошко Миленкоски направи промена на техничарите, наместо Ѓорѓи Ѓорѓиев влезе Филип Деспотовски, почнавме да играме помирно, имавме 19:17, но Хрватска направи серија од 5:1 и го доби третиот сет. Во четвртиот повторно бевме свои, го држевме ривалот на пристојна разлика и на крај го оставивме на 15 поени, но и во решавачкиот бевме падни-стани, на 12:10 за нас не го зададовме последниот удар, Хрватска повторно влезе во низа од 5:1 вои завршна фаза на сет и ја оствари првата победа во Европската златна лига.
Како и против Белгија во Шарлоа во саботата, останува простор за празнина што не забележавме триумф, а и затоа што реално можевме сега да имаме четири победи. Сепак, тие нијанси коишто го одредија резултатот во Белгија и во Хрватска, се доволен показател дека Македонија има потенцијал да ја достигне вистинската форма во август и во септември, на Европското првенство на коешто ние ќе бидеме коорганизатори.
