Македонија против бранителот на титулата – Полска, Русија – најтрофејна на ЕвроВолеј

Македонските одбојкари во четвртото учество во низа на ЕвроВолеј играат во најсилната група – групата Б, во Софија. „Пеколно“ друштво ќе имаат нашите момци со оглед на тоа дека ќе се соочат со домаќинот Бугарија – актуелен светски вицешампион, потоа Полска – актуелен европски првак, кој потврди дека во одлична форма влегува во одбрана на титулата откако минатиот месец ја освои ФИВБ Лигата на нации. Потоа следат Украина, Израел и Португалија, селекции со кои имаме и позитивно и негативно искуство. Едно е јасно пред никого нема да излеземе со „бело знаме“ без разлика на епитетот кој го носи.

Дел од интересните бројки и факти поврзани со Европските првенства во продолжение:

• Русија (вклучувајќи ги и медалите освоени и како СССР) e најтрофејна репрезентација на континенталните собири, вкупно 22, а истовремено има освоено и најмногу златни медали (14 злата, три сребра и пет бронзени медали);

• Италија досега седум пати била европски првак, а има вкупно 15 медали (седум златни, пет сребрени и три бронзени);

• Чешка и Србија го делат третото место со по три златни медали освоени на досегашните натпреварувања, додека на листата на селекции со најмногу освоени медели Србија е трета со три злата, едно сребро и осум бронзени медали;

• Полска, која како актуелен бранител на титулата патува на ЕвроВолеј 2026 има традиција од вкупно освоени 11 медали (две злата, пет сребра и четири бронзи);

• Шведска по пауза од 33 години ќе настапи на еден континентален собир;

• За Израел и за Швајцарија ова е вторпат едноподруго да учествуваат на ЕП;

• На четворица спортисти во историјата досега им успеало да освојат европски медал и како играчи и како тренери:

– Јозеф Чеспива – Чехословачка, во 1948 година, кога има двојна улога и на играч и на селектор на репрезентацијата;

– Андреа Анастаси – Италија – како играч на ЕП 1989, а како тренер на ЕП 1999 со Италија, односно ЕП 2007 со Шпанија;

– Фердинандо Де Џорџи – Италија – како играч на ЕП 1989, како тренер на ЕП 2021 со Италија;

– Никола Грбиќ – Србија – како играч на ЕП 2001, како тренер на ЕП 2023 со Полска;

Продолжува…