Селекциите на организаторот Босна и Херцеговина, како и Романија и Белорусија ќе бидат противниците на женската репрезентација на Македонија до 20 години во групната фаза од Зонските квалификации за Европското првенство 2027 година. Во другата група ќе се натпреваруваат Србија, Турција, Бугарија и Русија. Со одлука на Европската конфедерација (ЦЕВ) Русија и Белорусија иако не се дел од Балканската асоцијација (БВА) ќе бидат вклучени во првата рунда т.н. Зонски квалификации.
Девојките од 19 до 23 август во Мостар, БиХ ќе се обидат да ја минат првата фаза од квалификациите и да обезбедат пласман во втората рунда, која ќе се игра од 21 до 24 јануари следната година.
Македонија го отвора турнирот на 19 август кога на пладне ќе се соочи со Романија. Ден подоцна, во второто коло од 14:30 часот игра со Белорусија, додека групната фаза девојките ја заокружуваат на 21 август, кога од 19:30 часот играат со домаќинот БиХ.
На 22 и 23 август ќе се играат натпреварите за пласман, но се уште не е точно дефинирано колку селекции од овој турнир ќе продолжат во следната квалификациска рунда во јануари. (оваа одлука е во зависност од бројот на пријавени репрезентации во другите пет Зонски квалификации)
Репрезентацијата на Македонија до 20 години во понеделникот ги стартуваше подготовките за овие квалификации и ќе има скоро еден месец за темпирање на формата за оваа голема шанса која ја има нивната генерација.
