Ветераните на велешки Борец втора година во низа се шампиони во Државната одбојкарска лига на ветерани, односно ја одбранија титулата на завршниот турнир кој викендов се одржа во Тетово. Единствената лига на ветерани во Македонија викендов ја затвори втората сезона.
Во финалето Борец со 2:0 (25:17, 28:26) го победи домаќинот Шкендија и со тоа ја потврди својата доминација втора година во низа во оваа возрасна конкуренција.
Бронзениот медал им припадна на ветераните на Тетово, кои со 2:0 (25:13, 25:19) го совладаа составот на Скопје.
По завршувањето на финалето на најдобрите три екипи ОФМ им додели пехари и медали – претседателот Петар Јовановски ги додели одличјата за шампионот, генералниот секретар Филип Деспотовски ги награди финалистите, додека претседателот на ОК Ветерани Струмица, Јани Караманолев, беше задолжен за медалите за третопласираниот тим.
Државното првенство за ветерани во кое учествуваа седум екипи се играше во период од шест месеци (април – октомври 2025) во кое во регуларниот дел од сезоната или лига – системот се одиграа шест кола, секој со секого, каде екипата на Тетово имаше перфектен скор од шест победи во исто толку натпревари.
Четирите најдобри екипи се соочија во полуфиналето на плеј-офот, каде во градското дерби Тетово со 2:1 загуби од Шкендија, додека сега веќе ново-стариот шампион беше подобар од Скопје со 2:0.
ДРЖАВНА ЛИГА НА ВЕТЕРАНИ 2025
ФИНАЛЕН ТУРНИР
МЕЧ ЗА 3. МЕСТО
ТЕТОВО – СКОПЈЕ 2:0 (25:13, 25:19)
ФИНАЛЕ
ШКЕНДИЈА – БОРЕЦ ВЕЛЕС 0:2 (17:25, 26:28)
КОНЕЧЕН ПЛАСМАН:
1.БОРЕЦ ВЕЛЕС
2. ШКЕНДИЈА
3.ТЕТОВО
4. СКОПЈЕ
5. 11 ОКТОМВРИ ПРИЛЕП
6. СТРУМИЦА
7. ГЕВГЕЛИЈА
