Градот Софија и арената „Софија“ ќе бидат локацијата на која ќе се играат натпреварите од групната фаза, како и осмина и четвртфиналните дуели од Европското првенство 2026 во машка конкуренција.
Тоа значи дека домаќинот Бугарија, репрезентацијата на Македонија, како и Полска, Украина, Португалија и Израел, кои се дел од групата Б на ЕвроВолеј 2026 ќе играат во Софија.
Бугарската одбојкарска федерација првично ја имаше пријавено Варна како град-домаќин на ЕП 2026, со сала чии капацитет е три илјади гледачи. По успехот кој машкиот национален тим на Бугарија го имаше на Светското првенство минатиот месец кога играше финале и го освои сребрениот медал, амбициите пораснаа, па беше поднесено барање до Европската одбојкарска конфедерација (ЦЕВ) за промена на локацијата, односно арената „Софија“ со капацитет од 12 илјади публика. Во интерес на одбојката, како и нејзина што поголема популаризација, ЦЕВ даде позитивен одговор на ова барање.
Репрезентациите кои ќе настапат на ЕвроВолеј 2026 се во исчекување на распоредот на натпреварите, кој ЦЕВ треба даго објави откако ќе ги дефинира термините со четирите домаќини на ЕП 2026. Почетокот на продажбата на билетите за континенталниот собир е закажан за 7 ноември.
