Јанта Волеј Кисела Вода е нов шампион во женска конкуренција. Тимот од Кисела Вода стави крај на тригодишната доминација на Работнички Скопје, откако вечерва со 3:1 (14:25, 25:23, 25:19, 25:22) стигна и до третата победа во финалната серија и во три чекори ја освои четвртата шампионска титула во клупската историја.
Работнички Скопје тргна сигурно во салата „Независна Македонија“, имаше константна контрола над играта во првиот сет и со 14:25 поведе со 0:1. Но, во продолжението домашните одбојкарки ги надминаа почетниот грч во играта и ги превземаа работите во свои раце.
Бранителот на титулата водеше со 3:8, 4:10 и 6:12 кога се случи „будење“ во тимот на Јанта и со серија од 5-0 прво се доближи на 11:12, а потоа се избори и за комплетен пресврт, 20:16, односно 22:20 и користејќи ја втората сет-топка, со 25:23 изедначи на 1:1. Во третиот сет егал играта траеше до 8:8, по што Јанта Волеј со нова серија поведе со 15:8 и со сигурни 25:19 се избори за пресврт од 2:1.
Голема борба се водеше во четвртиот сет. Јанта Волеј создаваше предност од два-три поени, но Работнички Скопје секогаш наоѓаше начин како да се врати во игра. Во овој период од играта гледавме убави, долги поени, во квалитетна игра како во полето, така и на мрежата. Гостинките се обидуваа да се изборат за петти сет и да останат во игра за титулата, но Јанта Волеј ја искористи првата сет и меч топка, за 25:22 и конечни 3:1.
Новиот шампион го предводеа Мери Бошковска со 19 поени, Ива Стојковска со 12, како и Валерија Собол со 11 поени, додека во редовите на Работнички Скопје, Стакхаус и Дикова освоија по 13 поени, додека капитенката Баталаковска имаше 11 поени.
Одбојкарките на Јанта Волеј КВ откако не успеаја да се радуваат во финалето на Купот на ОФМ, стигнаа до четвртата шампионска титула со која на перфектен начин ја крунисаа годината во која слават 20 години од постоењето на клубот.
