Македонија загуби од Израел со 3:2 (26:24, 25:22, 22:25, 24:26, 15:9) во последниот натпревар на традиционалниот меморијален турнир „Бранко Хаџииљоски Чајка“. Противникот беше одличен тест за нашата репрезентација пред квалификациските натпревари за ЕП 2026 со Грузија и со Грција на 17-ти ина 25-ти овој месец.
Израелците ги освоија првите два сета, црвено-жолтите израмнија, но не успеаја да направат целосен пресврт, па со две победи го освоија првото место. Ние сме втори со триумф над Косово и пораз од Израел.
Капитенот Никола Ѓорѓиев беше најефикасен на мечот во салата „Парк“ во Струмица со 24 поени, Александар Љафтов заработи 19, двоцифрен беше и Филип Маџунков со 13. Филип Савовски изброја 9, Владо Милев 8, Ѓорѓи Ѓорѓиев 3, а резервистот Филил Лепидовски придонесе со 1 поен.
Избраниците на селекторот Хари Наковски имаа послаб процент на напад од Израелците, формираа еден активен блок повеќе, но имаа три аса помалку, па вторпат загубија од денешниот ривал во подоготовките за квалификациите за континенталниот собир. Претходно ги одмерија силите и на заеднички тренинг во средата. До патувањето во Грузија в петок, македонските одбојкари ќе тренираат во Струмица и на тој начин ќе се обидат да ја достигнат потребната форма.
