Гостувањето во Белгија внесе ведрина во македонската одбојкарска репрезентација. Последниот турнир од Европската златна лига во Осиек треба да биде надополнување на победата над Азербејџан и особено на големата борба со два освоени сета против Белгија. Денешниот натпревар против Хрватска влегува во истата категорија.
„И сега очекувам долг натпревар во којшто ние ќе ја повторниме играта со Белгија. Тие имаат добри индивидуалци како коректорот Џирлиќ и тројцата примачи, но и ние имаме свои адути. Се надевам дека ќе најдеме решение, дека ќе бидеме на исто ниво со нив и ако даде Господ, можеме да извојуваме победа што се разбира дека ќе ни значи“, истакна селекторот Хари Наковски.
Хрватска направи одлична серија во Европската златна лига. Оствари четири победи, сите со четири одиграни сета. Финска, Белгија, Романија и Португалија влегоа на менито на амбициозните Хрвати, кои ќе го организираат завршниот турнир, па ќе направат се да бидат убедливи против Македонија. Лани во истото натпреварување двапати одигравме по пет сета, секој славеше дома, а двете селекции забележаа по еден успех и во полуфиналето во Сребрената лига. Тие во 2018-та во Скопје, ние во 2021-ва во Струмица.
„Пак ги гледав последните два дуела со Хрватите и навистина во маратонот пресудна беше една топка, ние победивме со 16:14, а загубивме овде со 15:13. Мислам дека двете репрезентации се изедначени, но интересно е тоа што Хрватска сега има четири победи, а со тој ефект изненадени се и тие самите. Со оглед дека завршниот турнир ќе биде кај нив, останува денеска да видиме дали победите им се како последица на слободната игра. Имаат играчи што можат да направат разлика, но и ние имаме квалитет, само да ги надминеме ситните повреди, па можеби повторно ќе има пет сета“, вели капитенот Никола Ѓорѓиев.
Противникот ќе се насочи на резултат, ние посакуваме играчки раст. Сегашното 10-то место во конкуренција на 12 репрезентации во Европската златна лига за нас е во ред. Ако може да се напредува зошто да не, иако секој тренинг и секој натпревар во овој термин е подготовка за квалификациите во август, односно е коцка во калдрмата што води кон наше четврто европско по ред.
