Заврши основниот дел од сезоната во македонскиот одбојкарски шампионат, последното коло немаше влијание на учесниците во елиминацискиот сегмент, но реши дека екипата на Работнички 71&22 ќе ја има предноста на домашниот терен против Штип УГД. Освојувачот на годинашниот куп имаше можност на домашен терен да се избори за привилегијата серијата да ја почне пред своја публика, но скопскиот состав оствари гостинска победа, го задржа второто место на табелата и на тој начин му се реваншираше на ривалот за поразот во истата фаза на завршниот турнир во купот. Првата пресметка на Работнички и на Штип УГД е утре со пренос на МТВ-3 од 17 часот и 30 минути, а во другото полуфинале, бранителот на титулата, Струмица 47&72, како голем фаворит ќе го пречека Универзитет во Тетово в четврток.
Во утрешната (03.04.2024) двојна програма во салата „Независна Македонија“ во ОУ Невена Георгиева – Дуња, ќе ја сочинува и првиот дуел од полуфиналето кај дамите меѓу Јанта волеј и Работнички Скопје. Тимот од Кисела вода заврши втор во лигата, актуелните првенки беа трети, па затоа првиот меч и евентуалната мајсторка ќе бидат на теренот на Јанта волеј. Таква предност ќе има и најдобриот состав досега во сезоната Струмица жени во соочувањето против Наковски волеј.
Полуфиналните серии ќе траат до две победи, односно најмногу три натпревари, а домаќини на мајсторките ќе бидат екипите коишто ќе играат пред своја публика во првите средби.
Екипата на Ускана, пак, се враќа во најсилен ранг од следната сезона откако во тековната беше најдобра во Втората лига. Кичевки ја совладаа Форца волеј Ема со 3:0 во последниот натпревар и го освоија првото место што значи дека Газели волеј како второпласиран тим ќе игра со Вардар ЕМ во бараж двомечот за настап во елитата во натпреварувачката 2024/25. Вардарки завршија седми во прволигашката конкуренција.
Прва лига (мажи), полуфинале, први натпревари
Работнички 71&22 – Штип УГД (среда, 17.30, МРТ-3)
Струмица 47&72 – Универзитет во Тетово (четврток, 19.00)
Прва лига (жени), полуфинале, први натпревари
Струмица жени – Наковски волеј (среда, 19.30)
Јанта волеј – Работнички Скопје (среда, 20.15)
Бараж за Прва лига (прв натпревар)
Газели волеј – Вардар ЕМ (среда)
Втора лига (жени), 18-то коло
Ускана – Форца волеј Ема 3:0 (25:15, 25:21, 25:11)
Табела: Ускана 16-2, Газели волеј 16-2, Пелистер волеј 14-4, Бами Кор 14-4, Виктори волеј 9-9, Фламинго волеј 8-10, Форца волеј Ема 7-10, Македонија Макс 2-16, Универзитет во Тетово 2-16, Куманово 2-16.
