Иако до крајот на основниот тек од сезоната има уште едно коло, веќе се познати полуфиналните двојки во разигрувањето од женскиот одбојкарски шампионат на Македонија. Струмица жени и Јанта волеј уште претходно ги обезбедија првото и второто место на табелата, а по вчерашното дерби од петтото коло во Втората фаза-1, Работнички Скопје е сигурно трет, а Наковски волеј четврти. Тоа значи дека во полуфиналето до две победи, односно со најмногу три средби, ќе има еден струмички и еден скопски дуел.
Поради подобриот ефект во досегашниот дел од сезоната (18-1), екипата на Струмица жени ќе ја има предноста на домашен терен против Наковски волеј кој забележа 10 триумфи на 19 натпревари. Во сочувањето на составите од главниот град, бранителките на двојната круна, одбојкарките на Работнички Скопје, ќе почнат на гости во серијата со Јанта волеј кој има ефект 13-6. Вчерашниот успех во Струмица против Наковски волеј беше 11-ти за Работнички Скопје.
Но пред одигрувањерто на последното коло од лигашкиот сегмент коешто не може да промени ништо, најдобрите четири тима во двете конкуренции, од четврток до недела ќе се надмудруваат за пехарот во купот. Завршниот турнир е во Штип, во четврток се полуфиналните мачеви кај мажите, а в петок полуфиналето кај дамите. Финалните натпревари се закажани за недела.
Одбојкарски куп на Македонија (сезона 2023-24), сала „Јордан Мијалков“ – Штип
Полуфинале (мажи) – четврток 21.03.2024
17.00 Работнички 71&22 – Штип УГД (пренос јутјуб канал на ОФМ)
20.00 Лирија – Струмица 47&72 (пренос јутјуб канал на ОФМ)
Полуфинале (жени) – петок 22.03.2024
17.00 Струмица жени – Работнички Скопје (пренос јутјуб канал на ОФМ)
20.00 Наковски волеј – Јанта волеј (пренос јутјуб канал на ОФМ)
Финале – недела 24.03.2024
12.00 Финале (жени) – пренос МТВ-3
15.00 Финале (мажи) – пренос МТВ-3
