Одбојкарките на Јанта волеј се радуваа третпат сезонава во третиот меѓусебен натпревар со Работнички Скопје, денеска со 3:1 (18:25, 29:27, 27:25, 25:22), а со тоа го обезбедија второто место во полуфиналето од разигрувањето. Бранителките на двојната круна од лани го добија првиот сет, но не ја задржаа предноста, па за нив останува трката со Наковски волеј за третата позиција којашто ќе им донесе полуфинале токму со Јанта волеј. Екипата на Струмица жени е сигурна на првото место затоа што досега има максимален биланс од 17 победи и ниту еден пораз.
Вечерва со салата „Независна Македонија“ во Кисела вода, најефикасна беше Мери Бошковска од Јанта волеј со 20 поени, а нејзината соиграчка Бојана Маројевиќ заврши со 13. Кај Работнички Скопје, Тамара Стојанова имаше 17, а странските засилувања, Турчинката Јузгенч и Американката Робинсон, реализираа 14, односно 9 поени.
Прва лига (жени), Втора фаза-1, 3-то коло
Наковски волеј – Струмица жени 1:3 (17:25, 25:20, 16:25, 13:25)
Јанта волеј – Работнички Скопје 3:1 (18:25, 29:27, 27:25, 25:22)
Табела: Струмица жени 17-0, Јанта волеј 13-4, Работнички Скопје 9-8, Наковски волеј 9-8.
