Иако единствена цел беше да играат, да почувствуваат како е на европската сцена и да ги добијат почетните параметри за тоа како треба да работат и да се развиваат во иднина, македонските одбојкарки посакуваат да го завршат настапот во Европската сребрена лига со освоен сет. Од нив секако беше нереално да се бара каков и да било резултат, затоа што македонската женска сениорска репрезентација се врати на терен по повеќе од деценија, па сегашната генерација нема интернационално искуство.
Знаејќи го сево ова, поразите се очекувани, а вистинската цел беше репрезентацијата да остава подобар впечаток со секој одигран натпревар. Тоа и се случи, затоа што по трите настапи во Скопје, девојките одиграа подобро во Естонија и во Летонија, но иако имаа шанса да заработат сет, не успеаја, па на денешното гостување во Австрија за крај на премиерата во Европската лига, ќе ја имаат истата желба.
Ривалките се исклучително мотивирани затоа што ќе го организираат завршниот турнир, а за подобра атмосфера сатаат да завршат на првото место во нашата група. Сега се втори, но само затоа што загубија сет повеќе од Естонија, која исто така има четири победи и идентични 12 бодови. Но без оглед како ќе биде, тимот на селекторот Стефан Пауновиќ ја оствари идејната замисла. За другото ќе треба да се работи отсега.
