Македонија загуби на гостувањето кај Белгија, а неуспешни игри викендов имаа и нашите противници на Европското првенство на коешто ќе бидеме коорганизатори во август и во септември. Полјаците го претрпеа првиот пораз во Лигата на нации, и тоа убедливо со 3-0 од Србија, со само 54 освоиени поени. Поранешниот олимписки, светски и европски првак претходно ги совлада Франција, Иран и Бугарија, а против Србите доживеа дебакл. Во истата конкуренција, Лигата на нации на ФИВБ, Холанѓаните се шести, односно на две позиции зад Полјаците. „Лалињата“ денеска ќе сервираат против Аргентина со надеж да ја остварат третата победа едноподруго. Откако на почетокот загуби од Американците, Холандија се радуваше против Куба и против Германија.
Во Европската златна лига во којашто годинава настапува и Македонија, вчера како нас минаа и Чесите и Данците. Последниот ривал за црвено-жолтите на Европското првенство, Чешка, загуби во Естонија со 3-0, па иако е прва, сега не изгледа така сигурна за пласман на завршниот турнир на којшто покрај домаќинот Хрватска ќе одат најдобрите репрезентации од трите групи. Естонија и Финска сега имаат реални шанси да ја загрозат чешката селекција, а во трка е и Данска со која ќе го отвориме еврошампионатот во Скопје на 30-ти август. Данците беа поразени на гостувањето кај Португалија во три сета, но со биланс 2-2 и натаму имаат математика за прво место без оглед што во нивната конкуренција Турција важи за прв фаворит.
