Десет проценти од капацитетот на арената „Борис Трајковски“ е веќе исполнет за Европското првенство, информираат од Одбојкарската федерација на Македонија. Билетите главно ги купуваат странските навивачи, најмногу од Полска, која е најсилна репрезентација во групата во Скопје од 30-ти август до 6-ти септември. Холанѓаните вообичаено доаѓаат кај нас за летен туризам, па се очекува и нивниот поддржувачки контингент да биде значаен. Црна Гора и Чешка претходно немаа голем број навивачи на европските првенства, а интересно е да се види како ќе реагираат Данците коишто по десет години повторно ќе учестуваат на континентален собир. Тие, како и Чесите, се можеби насочени кон настапите во Европската златна лига во којашто игра и Македонија, а Холанѓаните и Полјаците ја имаат честа да бидат во најсилното друштво, односно во Лигата на нации.
Данците славеа над Романија и над Португалија и со тоа го покажаа својот потенцијал без оглед на поразот од Турција која најверојатно ќе оди на завршниот турнир од групата „А“. Чесите досега не погрешија во конкуренција на Естонија, на Финска и на Словачка, а Црногорците годинава решија да ја прескокнат Европската лига. На поширокото географско подрачје, во Лигата на нации, Полска има биланс 3-0 со успеси против Бугарија, Франција и Иран, а Холанѓаните загубија од Американците и славеа над Куба. Резултатите на нашите противници на Европското првенство во Скопје покажуваат колку ќе биде тешка задачата за пласман во осминафиналето, но се разбира не е неостварлива, затоа што многу работи ќе зависат од нас. А ние чекориме добро во Европската златна лига.
