На трите настапи во годишното натпреварување на ЦЕВ, македонските одбојкари остварија две победи. Тоа значи дека на вистински начин влегоа во бурниот период во којшто се бара уште еден чекор понапред во однос на претходните две европски првенства.
Резултатите во Европската златна лига не се приоритет, но добро е што во периодот кога се разгазува новата чизма, засега нема рани. Поразот во Украина беше очекуван со оглед на силата на ривалот, а победите над Белгија и над Хрватска имаат големо значење без разлика што противниците играа со подмладени состави. Оттука, гостувањето утре во Шарлоа перотив Белгија ќе биде уште еден силен показател за тоа дека Македонија игра подобро од последните две години.
Искуството е на наша страна, Белгија е одлично селектирана, млада и со играчи коишто тропаат на вратата на најдобриот состав. Квалитетот го демонстрираа во Скопје, но Македонија на тој дуел одигра одличен прв сет и покажа психолошка стабилност да се враќа по негатива. Натпреварувачката пауза од шест дена може да биде добредојдена за црвено-жолтите пред првиот сервис на утрешното соочување.
Што и да се случи во Шарлоа, Македонија ќе остане во трка за второто место, а со победа дури и за првото. Тоа е повеќе од очекувањата пред учеството во Европската златна лига и позитивна најава за Европското првенство.
