На македонските одбојкарки не им останува ништо друго освен работа, работа и само работа, како и да ја одржат атмосферата без оглед на резултатите во Европската сребрена лига. Не треба да се заборави дека ова е нивно крштевање на вакво натпреварувачко ниво, па уште претходно беше јасно дека во групата со Австрија, со Летонија и со Естонија е тешко да се очекува што било. Но желбата треба да остане, секој тренинг да биде мотивација, а на секој натпревар да се гледа напредок.
Во тој дијапазон на цели би требало да биде и утрешното соочување со Естонија во арената „Борис Трајковски“. За сите љубители на одбојката уште една можност да гледаат двојна програма со оглед дека потоа ќе играат и машките репрезетнации на Македонија и на Хрватска. Естонките се сериозна селекција, тоа го покажаа со две победи, особено убедлива онаа над Австрија која освои само 46 поени. Затоа, доколку составот на селекторот Стефан Пауновиќ остане на нивото од првите два натпрервара кога заработи 50, односно 59 поени, со постабилна игра, ќе биде успешно одработена задача.
Естонија ќе игра на претстојното Европско првенство како една од земјите коорганизатори, што значи дека вложува многу во женската одбојка, а досега во Европската сребрена лига покажа дека е атрактивна за гледање. Влезот во арената е слободен, македонските одбојкарски го очекуваат вашиот аплауз. Почетокот е во 17 часот и 30 минути.
