Триумфот над Белгија со многу позитивни детали во нашата игра, како и досегашниот биланс во групата „Бе“ од Европската златна лига, го наметнува мислењето дека македонските одбојкари ја презедоа фаворитската улога во утрешниот натпревар против Хрватска. Во континенталната елита и против кој било противник со повисок рејтинг, тешко се докажува напишаното на хартија, така што од националниот состав повторно се бара вистински пристап, а тоа е максимална подготовка, дисциплина на теренот и борба.
Параметрите се на наша страна. Македонија одигра два рамноправни сета со Украина, а ја совлада Белгија, за разлика од Хрватска која на гости кај истите ривали двапати беше поразена со 3:0. Отсуството на примачите Шестан и Седлачек е голем хендикеп, а во споредба со тимот којшто играше полуфинале со нас во Европската сребрена лига пред две години не се ниту центарот Дукиќ и либерото Сарчевиќ. Тогаш, на завршниот турнир во Струмица ги совладавме Хрватите со 3:2 со многу пресврти и израмнивме на 2-2 во меѓусебниот биланс. Претходно, исто така во полуфинале на завршен турнир од Европската сребрена лига, „коцкестите“ беа подобри во „Кале“ со 3:2 , а во септевмри 2012-та, во квалификациите за ЕП секој победуваше пред своја публика.
Предноста кај нас е и во искуството затоа што во составот на селекторот Јошко Миленкоски се 13-мина играчи коишто настапија на последнире два дуела со Хрватите, а кај нив нема ниту еден од оние што освоија сребро во Европската лига во 2013-тата кога во финалето загубија од Белгија. Сепак, тоа сребро, како и она од 2006-та со пораз од Холандија во финалето, а со триумф над Турција во полуфиналето, покажува доволно какво е реномето на репрезентацијата предводена од Французинот Седрик Енар. Французинот го замени Емануеле Ѕанини на кормилото лани откако Италијанецот беше поразен од нас во Струмица, а потоа не успеа ниту да донесе бронза. Ѕанини загуби во Скопје во средата како кормилар на Белгија, a неговиот наследник на клупата на Хрватска, Енар, ќе биде под полесен оган затоа што без разлика на резултатите во групата, неговиот тим ќе игра на завршниот турнир како домаќин. Затоа овие натпревари за Енар се подготовка за најдобра форма во Задар на 24-ти и на 25-ти јуни, а од друга страна, пак, тоа е шанса за нас да притиснеме и на половина од оваа натпреварувачка фаза да се пробиеме на второто место.
Првиот сервис утре во „Борис Трајковски“ е од 20 часот и 15 минути, преносот е на МРТ-3, а вратите на арената се отворени, па очекуваме незаборавна саботна одбојкарска вечер, којашто ќе почне со пресметката на македонските одбојкарки со Естонија од 17 и 30.
