Секој сака да победува и без таа желба нема спорт, но македонските одбојкарки годинава во Европската сребрена лига пред се имаат задача да ја запознаат новата средина, да соберат искуство и да го продолжат патот на интернационалната сцена. Ако притоа можат да освојат сет, поен, или, пак, да дојдат до победа, тоа ќе биде значаен подарок за нивната храброст да исчекорат на непознат терен. Со саботниот натпревар против Австрија, македонската женска одбојка се врати на европските меридијани првпат по повеќе од десет години, така што процесот на создавање нова сениорска репрезентација е во почетна фаза.
Знаејќи го сево ова, успех би било Македонија в среда против Летонија да одигра барем за нијанса подобро отколку во саботата со Австрија. Поразот од 3:0 со 50 освоени поени на тимот на селекторот Стефан Пауновиќ не треба да демотивира, туку да биде уште едно камче во новиот мозаик. Тешко е да се каже која репрезентација е потежок противник за нашите девојки, но Летонија отсуствува од европските првенства од 1997-ма. Дотогаш трипати по ред беше на континенталните собири и секогаш се пласираше меѓу првите девет селекции. Сега, во Естонија освои еден сет за водство од 1:0, а тоа доволно зборува за квалитетот на Летонките.
Сепак, со поддршка во арената „Борис Трајковски“ од 17 часот и 30 минути, Македонија може да одигра подобро отколку против Австрија.
