Бранителот на титулата Наковски Волеј и дебитантот Вардар ЕМ, ќе се се соочат во финалето од Купот на ОФМ 2026 во женска конкуренција, кое се игра денеска, 17:30 часот во СЦ „Јане Сандански“ во Скопје.
За одбојкарките на Наковски Волеј ова е трето куп-финале во клупската историја, второ во низа, во кое се надеваат дека ќе имаат „трета среќа“ и ќе го одбранат пехарот.
Во полуфиналето струмичкиот состав го елиминираше Младост УГД, а сега пред него стои нов предизвикувач – Вардар ЕМ, кој покажа дека не смее да се потцени, во спротивно знаат тоа жестоко да го казнат.
„Ждрепката сакаше најдобрите две екипи од првенствената табела да се соочат во полуфиналето и одигравме еден тежок и борбен натпревар со многу надигрувања, одбрани, блокови и добри напади и добар сервис. Му честитам на Младост УГД за одличниот полуфинален меч и на моите девојки за борбениот натпревар. Финалето со Вардар ЕМ нема да биде нималку лесно. Видовме дека во полуфиналето со Газели Волеј, тие одиграа на едно многу високо ниво, маестрално, борбено. Се надевам дека во финалето ќе понудиме уште еден добар меч, ќе дадеме се од себе, ќе се обидеме да го смириме Вардар и ќе се потрудиме девојките да дадат малку повеќе за да стигнеме до втората куп-титула во низа“, истакна тренерот на Наковски Волеј, Хари Наковски и додаде: „Во женската одбојка, кој игра подобра одбрана, тој се радува на крајот. Се надевам со малку покомбинаторна игра и со подобар напад ќе и парираме соодветно на екипата на Вардар.“
Вардарки, пак, прв пат во клупската историја играат на финалниот турнир во Купот и изборија учество во финалето. Тие се надеваат дека позитивната серија ќе продолжи и во битката за трофејот.
„Девојките одиграа одличен полуфинален натпревар со Газели Волеј и можам само да им честитам! Понудија квалитетен натпревар, дисциплинирано во одбраната, паметно во нападот и со минимум грешки во сервисот. Направивме одлична анализа на противникот, го покажавме тоа на терен и на крај убедливо победивме. Наковски Волеј е фаворит во финалето. Го бранат пехарот, но и факт е дека имаат поискусна екипа, подолга клупа и се квалитетно покриени на сите позиции. Ние се надевам дека ќе ја повториме играта од полуфиналето. Нема да се предадеме, ќе се бориме за секоја топка, за секој сет, два, па зошто да не и за победа и трофеј!? Ќе дадеме се од себе за да го направиме финалето интересно и да приредиме уште едно големо изненадување“, оптимистички размислува тренерот на Вардар ЕМ, Јован Шапе и продолжува: „Ги повикувам сите поддржувачи на нашиот клуб како и целата македонска јавност да дојде во сабота во ‘Јане Сандански’ и да не поддржи во финалето, верувам дека ќе уживаат во натпреварот.“
Вардар ЕМ и Наковски Волеј го отвораат финалниот ден од 33. издание од Купот на ОФМ 2026, кога од 17:30 часот, во СЦ „Јане Сандански“ во Скопје ќе се соочат во женското финале.
Влезот во салата е слободен, а финалето ќе има и директен ТВ пренос на МРТ3.
