Голема борба и меч кој траеше скоро два часа (117 минути) го обележаа европското деби на последниот македонски претставник сезонава во Европа, Штип УГД. Одбојкарите на актуелниот носител на куп-пехарот со 3:1 (35:33, 22:25, 25:18, 25:23) загубија во Осло, кај норвешки Кол Ил, во првиот меч од првата рунда во ЦЕВ Челинџ купот.
Во маратонскиот прв сет македонскиот претставник не успеја да реализира дури шест сет топки и на разлика 35:33 го загуби сетот. Во продолжението се играше изедначено во текот на сите сетови и пресудија нијанси.
Најрасположен играч кај Штип УГД беше Махди Задмард со 20 поени, следен од Леандро Оливеира со 18, а двоцифрени беа и Стојан Илиев со 14 и Стефан Алексов со 11 поени.
Реваншот се игра следната недела, 19 ноември, во 19 часот, во СЦ “25 Мај” во Радовиш.
